Lumeto, januaro 2026

Bonvenon al “Lumeto”, ĉiumonata novaĵletero por memorigi vin, kiel membron de la Kanada Esperanto-Asocio (KEA), pri la diversaj eventoj kaj okazaĵoj en la kanada Esperanto-movado. Koran dankon al la kunlaborintoj.

Feliĉan Novjaron 2026

Jen Novjara Mesaĝo de UEA kun oferto senpage elŝuti la januaran numeron de la revuo Esperanto.
Jen estraranoj de KEA por la deĵorperiodo 2026-2027:
- Geoffrey Greatrex – Prezidanto
- Garry Evans – Redaktoro
- Jordan Zero – Kasisto
- Bob Williamson – Sekretario
- Estraranoj: Ĵenja Amis, Trefleo Mercier, Andreo Sly, Luis Obando, John Huang

Nova VARIE okazos la 16an de januaro 2026

Ni ĉiuj, esperantistoj el la tuta Ameriko, kunvenas por konkretigi la veran spiriton de Esperanto… Vendredon la 16an de januaro ekde la 19h00 en orienta (Otava) horzono, esperantistoj el Kolombio gastigos nin, helpe de nia Guy Matte. Partoprenu ĉiuj, kiuj povas. Jen la Zoom-ligilo:

https://us02web.zoom.us/j/88055363035

Ĉu vi ofte ĉeestas esperantlingvajn kunvenojn?

Jen novaĵero en nia retejo pri nia lastatempa KVaK9: https://esperanto.ca/2025/11/09/9a-kanada-virtuala-kongreseto/

Bonvolu plenigi kaj sendi ĉi-tiun enketilon pri kunvenoj (kiel KVaK) kun viaj opinioj: https://docs.google.com/forms/d/e/1FAIpQLSda6e4QNftN_UgBODRsQ7OOvbGCfACGocX5O3dC1KUG5vKz8A/viewform?usp=header

Dankegon pro viaj respondoj, kiuj gravas al ni, kiuj planas venontajn eventojn!

Refoja mencio pri la plej aktuala “Lumo”

Karaj legantoj,

Jen la plej nova numero de “Lumo”, kaj la lasta sub mia redakto (la torĉon transprenos mia kara amiko kaj samurbano, Garry Evans). Tiu ĉi numero estas aparte bunta! Atendas vin profunda esploro de la temo Esperanto kaj kinoarto. Mi dediĉis ĝin al tiu temo pro la apero de nova kanada profesia filmo en Esperanto, “Himalia” — projekto, en kiu partoprenis multaj anoj de ESK kaj kies rezulto estas absolute brila! Vi legos plurajn artikolojn pri la granda evento de la jaro — la Dulanda Kongreso. Kiel ĉiam atendas vin pluraj aliaj artikoloj kaj literaturaj kontribuoj. Feliĉajn festojn kaj bonan legadon!

Amike,

Ĵenja Amis, la redaktoro

Lumo

Ĉu via membreco en KEA eksvalidiĝas?

Kiel vi sendube scias, la maniero pagi la kotizon de KEA jam ŝanĝiĝis:

Anstataŭ PayPal, KEA nun uzas la apon Zeffy.
Zeffy estas senkosta pagilo por neprofitcelaj organizoj kaj karitatoj kiel KEA. Zeffy kolektas mondonacojn por teni la servon senpaga por tiaj organizoj. Ne necesas aldoni donacon al Zeffy por akiri KEA-membrecon, tamen tiuj donacoj helpas teni Zeffy senpaga por ĉiuj.
Anstataŭ dujara kotizo, oni nun pagas ĉiujare la duonon de la dujara kotizo.
Se oni akceptas la aŭtomatan rekotizon, kiu okazos je la fino de la jaro (Automatic renewal / Renouvellement automatique), oni ne plu devos ĉiam memori la ĉiujaran neceson rekotizi.😃

Do, kiel scii, ĉu vi mem jam eksmembriĝis? Eble vi estas mirindulo kiu ja kapablas memori la daton de via pasinta pago, aŭ vi estas dumviva membro kiu jam pagis grandan sumon kaj neniam plu devas eĉ pensi pri tio. Se ne, kutime la sekretario ĉiujanuare sendas retmesaĝon al la membroj kiuj ĵus eksmembriĝis por persone memorigi al ili pri la neceso rekotizi. Tio refoje baldaŭ okazos, verŝajne por la lasta fojo. Poste ne necesos; jarkomence de 2027 absolute ĉiuj devos rekotizi por unu jaro, ĉu aŭtomate ĉu persone mane.

Kanadaj klub-renkontiĝoj en 2026

Jen la regulaj kunvenoj en Kanado nuntempe – Bv. disvastigi kaj partopreni ĉi-jare! Se vi volas starigi klubon aŭ kreskigi ekzistantan klubon, kontaktu Andy Blair ĉe ahblair@yahoo.com

Vankuvero Kultura Kumziko (Zoom)

La 1a jaŭdo monate, je la 18:30a horo PT

https://eventaservo.org/o/EO-Vankuvero

Vankuvera Renkontiĝo

La 3a jaŭdo monate, je la 18:30a horo PT

https://www.meetup.com/vancouver-esperanto

Viktoria Kafejo de Ideoj (Zoom)

Je la 9a horo PT, sabatomatene

https://eventaservo.org/o/ViktoriaEsperanto

Viktoria Renkontiĝo

La 1a merkredo monate, je la 10:00a horo PT

https://eventaservo.org/o/ViktoriaEsperanto